Informasie euver de Boètegewoeëne Boètezitting
‘t Stadscomité zörg d’r idder jaor weer veur, same mit tiëntalle vreejwilligers, det de stad klaor is um same mit óg aan de vastelaovend te beginne. As geej zörg vur ’n leuk pekske, de schmink en gooije zin, dan verwelkómme weej óg gaer op vastelaoveszaoterdaag in 't Stedje van Lol en Plezeer.
HISTORIE
Naodet ein aantal jaore op riej in Venlo ein Boètegewoeëne Boètezitting waas georganiseerd, greuide ut evenement eind jaore 90 explosief. Ut jaorlijkse aantal bezeukers steeg enorm, d’r kwame nieje initiatieve, miër podia, nieje deilnemers en belanghebbende. Nao de Boètegewoeëne Boètezitting van 2002 waas dees ontwikkeling en inkele daormei samehangende veiligheidsvraogstukke aanleiding veur de börgemeister van Venlo um ein aantal partieje beej mekaar te bringe: de directeur van de Maaspoort, Vors Joeccius XI van de stadsvastelaovesvereiniging Jocus, en ein vertegenwoordiger van L1.
Ut gezelschap concludeerde det d’r dringend behoefte waas aan steuring en regie door een euverkoepelende organisasie. D’r woord beslaote heejveur ein Stichting op te richte: Stichting Stadscomité BBZ (Boètegewoeëne BoèteZitting). Onder verantwoordelijkheid van ut Stadscomité wuurt sinds 2003 de Boètegewoeëne Boètezitting georganiseerd.
Doelstelling
De Boètegewoeëne Boètezitting wuurt georganiseerd door Stichting Stadscomité BBZ oét Venlo. In samewerking met L1 tillevisie wuurt de Brand Beer Boètegewoeëne Boètezitting georganiseerd, auk wal bekind as de Zoépkoèl.
Stichting Stadscomité BBZ druuëg zörg veur ein hoëgwaerdige en veilige organisasie van de Boètegewoeëne Boètezitting door as platform te deene veur alle belanghebbende partieje, maar auk directe steuring te gaeve aan de betrókke oétvoeringsorganisasies.
75
Vreejwilligers
139
Artiste
64
Sponsore
Podia
Ut evenementeterrein van de Boètegewoeëne Boètezitting besleit de ganse historische binnestad van Venlo. Verspreid euver de binnestad zien miérdere podia te vinde. Dees groeëte podia waere allewiels aangevuld met verschillende straot- en portieklokasies, die her en der in de binnestad spontaan zien ontstaon.
Weej neume heej inkele podia in 't biezonder: Op de Kwartelemert vond tot 2018 de "Blauwe Zaoterdaag" plaats. Vanaaf 2019 geit dees tradisie van aopelóch vastelaoves kleinkuns vaerder in ein ander jeske ónder de naam: ‘dn Blauwe zingk door’.
Ein hiél ander podium vindt geej in Domani, veurhaer bekind as de laat-middelieuwse kepel Mariaweide, die wies 2005 beej 't Dominicanekloeëster in de binnestad huuerde. Heej vindt de “Fiedelzaoterdaag” plaats.
Polsbendjes
Polsbendjes veur de Brand Beer Boètegewoeëne Boètezitting zien idder jaor ziér gewild. ‘Wie kóm ik aan polsbendjes?’ huuëre weej dan auk dök.
Polsbendjes waere verspreid door L11Alaaf en neet door Stichting Stadscomité BBZ. Weej kinne dan helaas auk niks met dees verzeuke um polsbendjes. Veur vastelaovesveerders die gaer de live oétgezónde Boètezitting in de Zoépkoel
wille bezeuke, zien d’r verschillende wies um aan polsbendjes te kómme. Hald dan de verschillende media van L1 in de gate!
Geej heb euveriges neet per se ein polsbendje nuuëdig um 't evenement te bezeuke: De Boètegewoeëne Boètezitting is ein gratis toegankelijk festival met 6 podia door de ganse Venlose binnestad. Allein beej 't podium op de Alde Mert (ofwaal de Brand Beer ‘Zoépkoel’), wao L1 sinds 1992 idder jaor ein live oétzending verzörg, heb geej ein polsbendje nuuëdig um op 't plein te kômme, de andere pleine zien vreej toegankelijk wies 't vol is.
Veiligheid
D'r wuurt door ós ein groeëte zörg besteid aan 't aspek veiligheid. In ut veurtrajek wuurt d'r dök euverlag mit de officiële hölpdeenste wie de brandweer, polisie en GHOR. Alle aspecte van hölpverleining zien bespraoke en vasgelag in ein calimiteite plan.
Ós letste niejsberichte en actuele informasie tiejes 't evenement kint geej gemekkelijk volge via de videoscherme in de stad, ós social mediakanale en de
website. Hald d'r raekening mei, det ut gebroék van 't
tillefoonnetwerk door de drökte verstoord kin waere.
Ut program is op haos idder podium geliek, heejdaor hoof geej niks te misse! Op de programma pagina kint ge zeen welke artiste op welk podium kómme.
Venlonaerke
De stadsmunt ('t “Venlonaerke”), det inkele jaore geleeje in 't laeve is geroope as service en betalingsgemaak veur alle vastelaovesvierders, is inmiddels ein groeët succes gebleke, vólges horeca en de publieke opinie. De aafgelaupe jaore zien alle operationele take um munt- en geldstraume in gooije bane te lieje adequaat ingevuld door ós dóchterstichting: Stichting Stadsmunt Venlo. Veur mier informasie euver de stadsmunt kiék op www.stadsmuntvenlo.nl
Laefregels
Det de vastelaovend ein waanzinnig fees is waor Limburg gruuëts op is, haove weej óg neet te vertelle. Toch deeje we ut zoejuus. Op ein evenement as de Boètegewoeëne Boètezitting waor tiëndoézende minse mekaar onmoete, motte d’r netuurlijk aafspraoke, ofwal laefregels waere gemak um ut fees inkel feestelijk te laote verlaupe.
Veur alle vastelaovesgekke, die op zaoterdaag veur de vastelaovend Venlo bezeuke, is door de organisasie: Stichting Stadscomité BBZ in samespraok met de veiligheidsdeenste ein regelement opgesteld. Laes ut heej nog ens nao en geneet van de vastelaovend!
Weej vraoge óg de volgende regels in ach te neme:
Neem goije zin mei en doot veural zutjes aan.
Eige drank, glaaswerk, blikskes, kretjes, flesse, lachgaas en vaetjes zien op alle evenemententerreinen neet toegestaon. Heej wuurt duchtig op gecontroleerd.
Laot groeëte objekte, wie spandeuk, bórde en andere veurwerpe thoés. Dees waere ingenaome in verband mit de veiligheid.
Genne alcohol veur Vastelaovesvierders ónder de 18 jaor!
Kôm verkleid! Det guuëf kleur en fleur aan de ganse stad.
Kinderwaages, bolderkerre en dergelijke waere i.v.m. de veiligheid neet tot de terreine toegelaote. Vanwaege de groeëte drukte raoje weej óg ten ziërste aaf um kleine kinder mei binne de toegangshekke te neme.
Damestoilette zien te vinde in de kefeekes en in de toiletwaages. Hiëre kinne sanitair terech beej de speciale veurzeeninge op de Picardie Huzareplaats, Jongerekerk, poskantoër, Kwartelemèrt, achter 't stadhoés, in de Maaspoort en beej diverse veurzeeninge in de stad.
Hald de beeldscherme die her en der staon opgesteld, de boetezitting site, Instagram en Facebook in de gate veur al 't actuele niejs.
Wins van iddere mins: det 't ein groeët Limburgs fees meug waere, wao weej gruuëts op zien.
Bin leef veur mekaar.
Ut betreeje van de evenementeterreine geschiedt op eige risico.